Delala ber dilê min Şengala Rengîn

Ey delala dilê min, ev çi qiyamete bi ser te de dibare?

Ev çi tofane destê xwe ji te naqere?

Xwezî min karibya te hemêz bikim û

Wan destê qirêj ê li ser te bidim aliyekê

Xwezî min karibya te bigrim hemêza xwe û

hemû tofanên li ser te

bigrim ser laşê xwe.

Şengala rengîn!

Delala dilê min!

Warê Derwêş û Edûlan!

Tu xemgînî

Ez dizanim

Dilop bi dilop,

Xwîna Kurdan li ser xaka te diherike.

Ey hawar ev çi dewrane?

Ev çi dîroke?

Ev çi tovê îxanetê ye dev ji me Kurdan bernade?

Ev çi rastiye bira bira dikuje,

Xwîşk silav nade xwîşka xwe,

Dayik zarokê xwe nehlet dike?

Ev çi birane

Qaşo te diparêzin lê

Te dikin parî û didin ber devê dijminên te yê herî wehşî?

Delala ber dilê min!

Şengala rengîn!

Wê rojek were û

Di nav pelên dîroka sipî de Edûleyên te bibin keçên zêrîn

Wê Derwêşên te yek bi yek bibin Mazlum û Kemal

Wê dîrok bi çelengiya keç û xortên te

Bibe xezeb û bibare ser rûyê îxanetkaran

Wê dîrok wan mirovên ku te kirine pariyê Ereb, Tirk û Farsan

Rûreş bike, rûreş bike

Tenê tu sebir bike delala ber dilê min

Şengala Rengîn!

(Ji bo bîranîna şehîd Nujiyan Erhan)