Bi sedan şêniyan sersaxî da malbata şehîd Azadî
Şêniyên bajarên Dêrik, Girkê Legê, Çilaxa sersaxî da malbata fermandar û rêvebera gaziyên şer Azadî Helebçe.
Rêvebera Federasyona Gaziyên Bakur û Rojhilatê Sûriyeyê şehîd Azadî Helebçe îro bi merasîmekê li Pakrevangeha Şehîd Xebat Dêrik a li bajarê Dêrikê, hat veşartin.
Piştî merasîma spartina axê merasîma sersaxiyê li Navenda Şehîd Bawer a Ciwanên Şoreşger li bajarê Dêrikê bi deqeyeke rêzgirtinê dest pê kir.
Endamê Meclîsa Malbatên Şehîdan li Dêrikê, Ciwan Hesen axivî û bal kişand ser rola şehîdan a ji bo bidestxistina aştî û jiyaneke birûmet ji bo hemû gelan. Hesen wiha lê zêde kir: “Şehîdên ku li gorî raman û felsefeya Rêber Abdullah Ocalan têkoşiyan, roniyên aştiyê ne û fedakariya wan di dîrokê de hatiye nexişandin.”
Endamê Meclisa Efrînê li Girkê Legê Henan Sîdo got: “Divê em soza xwe nû bikin ku em li ser şopa şehîdan bimeşin, ji ber ku wan biratiya gelan û jiyana hevbeş di navbera hemû civakan de ava kirin û wan herêm ji komplo û xiyanetê parastin. Şehîd dudil nebûn ku xwîna xwe ji bo rizgarkirina hemû civakan feda bikin.”
Merasîm bi dirûşmên dilsoziya bi şehîdan re bi dawî bû.
