Dîrok û Nasname

Hebûn dîrok û nasnameya min

Li ser rûpela zêrîn zimanê min jêre pênûs e

Rûyê min jêre lênûsk e û hevokên min jêre pênûs e

Weke navê rojê bûyeran vedibêjim

Serdestan min ji ser deftera dîrokê avêtin

Bi şûrê xwe pênûsa min şikandin

Kuştina min ji xwe re serkeftin dîtin

Welatê min nenas kirin

Helwestên min qedexe kirin

Dewlemend bûm min xizan kirin

Roj tarî kirin li ser welatê min

Hemû diz li warê min civîyan lê nekarîn

Ne dengê min ne jî vejîna min bêdeng bikin

Lewma ez ê xwe ji dîrokê re bikim xelat

Xwe ji gelê xwe re bikim diyarî

Dîroka min ji şûrên wan xurttir e

Di kêliya serdemê de bibim zimanê rastiyê

Bi lênûsê nasnameya xwe ronak bikim

Nasnameya min bi qasî xwezayê fireh

Bi qasî pak e

Ji rondikên asîman zelaltir e

Min bi qîrînên çavên xwe sînor teqantin

Welatê min li ser kefa destê min kolandî ye

Di bîr û ramana min de cih girtiye

Lewma hebûna min efsane ye