Ji Federasyona Gaziyan li dijî tecrîdê daxuyaniya çapemeniyê

Federasyona Gaziyên Bakur û Rojhilatê Sûriyeyê bi daxuyaniyekê tecrîda li ser Rêber Abdullah Ocalan şermezar kir. Bi dehan endamên federasyonê tevlî çalakiyê bûn.

Endamên federasyonê Yusif Îbrahîm û Hogir Amed daxuyanî xwendin.

Daxuyaniya Federasyona Gaziyên Bakur û Rojhilatê Sûriyeyê wiha ye:

“Li hemberî Rêber Apo yê di encama komploya navneteweyî ya hêzên emperyalîst û dagirker de ev 25 sal in li Girava Îmraliyê tê girtin, tecrîdeke girankirî ya li cîhanê mînakeke wê nîne tê meşandin. Bi vê tecrîdê re tê xwestin ku têkoşîna azadiyê û ya gelên Rojhilata Navîn were tesfiyekirin. Ev tecrîda ji rêbazên komploya navneteweyî ye û yek ji sûcên herî giran ê li hember mirovatiyê ye 40 meh in bênavber berdewam dike.

Dewleta Tirk a dagirker û hevkarên wê di polîtîkaya xwe ya şer û tecrîdê de israra xwe didomînin. Ev dewleta faşîst û hikûmeta wê ya AKP-MHP’ê bi pêşxistina tecrîda li hember Rêber Apo, şer, şîddet û zextan dixwaze temenê xwe dirêj bike.

Domandina tecrîd û êrîşan li ser esasê konsepta temamkirina qirkirina gelê Kurd, Rojhilata Navîn veguherandina gola xwînê, li hember dagirker û despotan bêalternatîf hiştina gelan e. Dewleta Tirk a faşîst tesîr û bandora Rêber Apo ya li ser Tevgera Azadiyê û gelên Rojhilata Navîn baş dizane. Lewma naxwazin tenê gotineke Rêber Apo derkeve derve.

Dewleta Tirk a dagirker li ser gelê Kurd û gelên bi paradîgmaya Rêber Apo xwe bi rê ve dibin û hewl didin bi azadî bijîn, teslîmiyetê ferz dike. Dîktatorê faşîst Erdogan ê tevahî polîtîkaya xwe li gor şer, tecrîd û êrîşan diyar dike, dixwaze welatên weke Iraq û Îranê jî bikişîne nav vê plana xwe ya bixwîn. Bi vî rengî plan dike şer li tevahiya herêmê belav bike.

Dewleta Tirk a faşîst û dagirker bi hevkariya KDP’ya ku xiyaneta li hember nirxên mirovên azad êdî eşkere dimeşîne, her roj li dijî Herêmên Parastinê yên Medyayê êrîşan pêk tîne. Dîsa li hemberî herêmên Bakur û Rojhilatê Sûriyeyê êrîş berdewam dikin.

Dewleta Tirk a faşîst a hebûna xwe di qirkirina gelan de dibîne, ew qasî ji hêz û qudreta Rêber Apo ditirse ku tevî hemû bangên gelan, sazî-dezgehên mirovî û dostên Kurdan tecrîdê berdewam dike. Dinya û alem dizane ku dema dengê Rêber Apo bigihîje gelan û Rêbertî bi awayekî fizîkî azad bibe wê ew tevahî plan û stratejiyên qirêj ên dewleta Tirk a dagirker û hevkarên wê pûç bibin.

Ev tecrîda mutleq û li derveyî hemû nirxên mirovatiyê ye di serî de gelên Bakur û Rojhilatê Sûriyeyê hemû gelan dixe nav fikaran. Weke gaziyên şer ên Bakur û Rojhilatê Sûriyeyê em vê êşkence û tecrîda li hember Rêbertiya me tê meşandin ti carî qebûl nakin. Em dewleta Tirk a dagirker û hevkarên wê yên heya qirikê ketine nav xiyanetê hişyar dikin: Tavilê dest ji van kiryar û pêkanînên xwe berdin. Divê her kes vê bi awayekî eşkere zanibe ku weke gaziyên azadiyê yên ji bo azadiya xak û gelên xwe berdêlên giranbiha dane em ê ti carî dest ji doz û têkoşîna xwe bernedin. Em ê ji bo Rêbertiya ji dayîna berdêlan xwe paşde nedin.

Helbet gelên me li dijî tecrîd û êrîşan di nav berxwedaneke bêhempa de ne. Lê divê em asta çalakî û bertekên xwe bilindtir bikin. Li ser vî esasî di serî de jin û ciwan em bang her kesî dikin ku li hember vê tecrîda mutleq û êşkenceya li hember Rêbertiya me xwedî li berpirsiyariyên xwe derkevin, li her cihê lê ne çalakiyan pêş bixin. Em bi ruhê berxwedêrên azadiyê bi xurtî li Rêbertiya xwe derkevin.”