STAR

Ez digeriyam,

Li deşt, newal û zinaran,

Hate guhê min…..

Dengê fîxan, qêrîn û hewaran,

Xwîn ji dilan vedizê….

Mîna cuh û cobaran.

Piştî şevên tarî….

Bê dengî, seqem û sarî….

Li me geşkir tave heyvek.

Ji serê çiyayê berz û bilind,

Derket xemlek mîna find,

Ew keçek ciwan bû,

Ji wê de tê….

Bi çek û rext bû,

Bi pênûs, çenk û per bû,

Ew şox, şemal û ronahî bû,

Bi şal, şapik û lewendî bû,

Rengekî xwedawendî bû,

Dilobek ji ava zelal û berfîn bû.

Xwedana serpêhtiya ….

Xem û xeyal û hêviyan bû.

Me jê pirsî bi aramî,

Bersiv da me bi sergiranî,

Avête me yek awirek….

Mîna tîrên med û persan

Kezep dane ber xedengan.

Gote me bi dil germî,

Gelo ma çiye şermî ?

Heger hûn bi tac û textin,

Dûrî min herin…..

Hûn bê bextin,

Na,heger hûn bi tol û bextin,

Mîna min bi çek û rextin,

Emê bi hev re bibin rêheval,

Nabin aşiqê dirav û mal,

Werin meydanê….

Mil bidin milê min.

Dayîka min û we ye,

Ev stêrk, çiya û zozan,

Kelat û birc û eywan.

Ewê bi van gotinan,

Dilê me sotand û kewand,

Perçek kezebê bû agir,

Perçê dî jî bû pêt.

Me got bêje tu kîyî?

Bi dengekî azadperest….

Ji xwe bawer û mest,

Bersiv da ……

Got ez im sitar,

keçka bi kezî me,

bi eslê xwe xwezayî me ,

ji dîroka dirêj hati me .

Ez ne tenê zînim û şêrînim,

evîna siwarê baskê şînim….

ji min re dibêjin Leyla Qasim,

Binefş û Bêrîtan û Şîlan im ,

keça medya me…..

hêvî û evîna Kurda me,

eşqa çiya me,

ew eşqeke bi rastiye,

lêdigerim ew azadiye,

heger hûnê bi min re bibin heval,

berdin qesr û sera û mal,

nepirsin li xweşiya jiyan,

Da nemînin êş û jan.

Were em berê xwe bidin rojê,

Bilind bikin vê dozê.

Bi hevre vejînin Mem û Zînan,

Ferhad û Şêrînan.

Me destê xwe dayê,

Bi hev re siwarbûn….

Li ser baskê bahoz û bayê,

Ketin nava deryayê ,

Beramberî pêlan ….

Em ketin ceng û şîlan,

Ber bi sitêrka sor û zer ….

Bi lez em çûn û gihane ber.

Silav û Rêz

29. 3. 2009