Cejna Remezanê ya gelên me pîroz be

Em di serî de Cejna Remezanê ya Rêber Apo yê bi salan e li Zindana Îmraliyê ji bo tevahî gel pêkve bi azadî bijîn di nav berxwedaneke muezem de ye pîroz dikin. Her wiha em cejna tevahî malbatên xwe yên şehîdan, şervanên azadiyê û hemû gelên Misliman pîroz dikin. Em hêvîdar in Cejna Remezanê bibe wesîleya avakirina jiyaneke aram û azad a hemû gelan.

Cejn ku di nav hemû bawerî û gelan de rojên aştî, hevgirtin, kêfxweşî û coşê ne mixabin li erdnîgariya em lê dimînin, hêzên dagirker û hegemon naxwazin gelên me cejnên xwe di nav aramî û hizûrê de bijîn. Lê belê divê em zanibin ku jiyaneke azad û bêzext bi berxwedan û têkoşînê ava dibe.

Hemû cîhan bi salan e şahidiya wê dike ku gelên me yên li Bakur û Rojhilatê Sûriyeyê bi derfetên şehîd û birîndarên me bi xwîna pêk anîne, şoreşeke ji mirovatiyê re bûye mînak ava kirin. Lewma eger em îro li herêmê di nav aramiyê de cejna xwe ya Remezanê pêşwazî dikin bi saya şehîdên me yên hêja ne.

Bi vê wesîleyê di vê Cejna Remezanê de divê em hîn xurttir xwedî li şehîdên xwe derkevin û wan di her kêliya jiyana xwe de bi bîr bînin.

Em bang li tevahî gelên xwe jî dikin ku piştevanî û hevgirtina xwe xurt bikin. Li dora Rêber Apo bibin xelekeke ji gul û kulîlkên ji her rengî. Divê em zanibin paradîgmaya Rêber Apo ya ekolojîk demokratîk û azadîxwaziya jinê ji bo tevahî pirsgirêkên ku gelên me kirine nav pêxîrtengî û tengasiyên mezin çareseriya herî bingehîn e.

Em jî weke gaziyên şer bi wesîleya Cejna Remezanê tevahî şehîdên xwe bi bîr tînin, li hemberî bîranîna wan bi hurmet bejna xwe ditewînin. Em diyar dikin em ê pêwîstiyên soza me daye Rêber Apo, Tevgera Azadiyê, şehîdan û gelên xwe teqez bînin cih.

Federasyona Gaziyên Bakur û Rojhilatê Sûriyeyê