Ez heme!..
Arîn Cizîr
Di cîhana zilaman de jin
Di dergûşa dilê mirovahiyê de jin
Di hinava avên zemzemê de
Di bilindahiya çiyayan û bedewbûna staran de
Di tovên axa bi jîn de
Ez Îştar, Nînhûrsag, Înanna şîn bûm
Di peravên bihuştê de
Ez dayik im, xwedawend im û tovê jiyanê me
Ya diafirîne, ava dike û jîn dike
Ez im bi qurbana sed û çar meyan
Bûme erd û esman
Ez heme hûn min nabînin
Li bajarê xwedayan li min negerin, hûn ê min nebînin
Ji rahiban pirsa min nekin hûn ê bersiva min negirin
Di dîroka bi tîpên mêran hatiye xemilandin de
Li navê min negerin hûn ê nebînin
Wê demê berê xwe bidin axa bi bereket,
li nava erşên xwedawendan de
Di dîroka hatiye gemarkirin de li min negerin,
Hûn ê li wir heqîqeta min a wendayî bibînin…
