EVÎNA WELAT
Ji pênûsa têkoşeran
Welato…
Ez çawa nebim kevirek
Di bend û dîwarên te yên herifî de
Ez çawa nebim
Bilbilek dil bi kul
Difire di asîmanê bajarê te yên şewitî de
Welato…
Ez çawa nebim
Ristek ji lewjên
Di qirika helbestvanên te de
Ez çawa nebim
Têlek ji saza şikestî ya hozanên te
Ez çawa nebim
Pêlava zarokek pêxwas ku li ser xaka welatê xwe bûye penaber
Welato…
Ez çawa nebim
Dilopek xwîn ji birîna
Di navbera mil û pêsîra delalê te de hatiye vekirin
Ez çawa nebim
Hevdek ji biskên Zîlana xwe kiriye evîndara jiyanê
Welato…
Ez çawa nebim
Çirûskek ji agirê
Ji bejna evîndarên te
Bilind bûye û bûye Newroz
Ez çawa nebim
Mistek ji kaxa sar li bin
Piyên xort û keçên di rêYa serfiraziya te de
Fincanek ser bi xwîn hilgirtine
Welato…
Li ber evîna te
Hemû evîndaran serî tewandin
Welato…
