‘Rêbertî çavkaniya jiyana azad û wekhev e’
Gaziya şer Zarîn Kobanê ya rojbûna Rêber Apo pîroz kir got, “Em weke jinên têkoşer rojbûna Rêbertiya xwe mîna rojbûna jina azad a serhildêr pênase dikin. Ev heqîqeteke berbiçav e. Rêbertî çavkaniya jiyana azad û wekhev e. Salvegera damezirandina YPJ’ê jî li hemû gelan pîroz be.”
Gel, şervanên azadiyê û gaziyên şer ên li Bakur û Rojhilatê Sûriyeyê, 76’emîn salvegera rojbûna Rêber Apo û 12. salvegera avabûna Yekîneyên Parastina Jin (YPJ) li her cihê lê ne bi coş û heyecaneke mezin pêşwazî dikin.
Gaziya şer û endama Federasyona Gaziyên Bakur û Rojhilatê Sûriyeyê Zarîn Kobanê têkildarî rojbûna Rêber Apo û salvegera avabûna YPJ’ê nêrînên xwe anîn ziman.
‘Rêber Apo rê li ber guhertinên mezin vekir’
Gaziya şer Zarîn Kobanê diyar kir ku ew rojbûna Rêber Apo di serî de li şehîdên azadiyê, jinan û gelan pîroz dike û got, “Em weke jinên têkoşer rojbûna Rêbertiya xwe mîna rojbûna jina azad a serhildêr pênase dikin. Ev heqîqeteke berbiçav e. Rêbertî çavkaniya jiyana azad û wekhev e. Nîsan di gelek baweriyan de meheke pîroz e. Rêberê me jî di meha Nîsanê de ji dayik bûye. Bi vê boneyê ez dayika me ya hêja Ûveyş jî bi rêzdarî bi bîr tînim. Rêber Apo hê ji zarokatiyê ve ket nav lêgerînên gelê Kurd û bindestan ji rewşa têde ne rizgar bike. Rêbertiya me dibêje, ‘Ey jiyan yan ez ê te bi azadî bijîm, an jî ez ê te mîna tu nehatiye jiyîn bihesibînim.’”
Zarîn bal kişand ser guhertinên li Kurdistan û Rojhilata Navîn ên bi Rêber Apo re çêbûne û wiha axivî, “Rêbertiya li Kurdistan û Rojhilata Navîn rê li ber guhertinên pir mezin vekirin, mirov li hember tehlûkeyên sîstemên kapîtalîst, hegemon û zordar hişyar kirin. Bi taybet jin serwext kirin. Rêya jiyana azad heya dawiyê ji her kesî re vekir. Herî zêde jî ev guhertin û veguhertin ji bo jinan bû vejîneke nû. Rêbertî nîşanî me jinan kir ku xwerizgarkirina ji bindestî û tinehesibandinê bi berxwedanê çêdibe. Hevrê Sara, Bêrîtan, Zîlan, Sema û hwd. pêşengên me yên jin bi pratîk û têkoşîna xwe nîşan dan bê hevrêtiya bi Rêber Apo re divê çawa be. Em ê timî xwe bi fikir û felsefeya Rêber Apo perwerde bikin û di şopa şehîdên xwe de bêteredut bimeşin. Rêya herî rast û dirûst ev e. Tenê bi paradîgmaya Rêber Apo em ê karibin vê kaosa li cîhanê rû dide bi dawî bikin, jiyana azad û wekhev ava bikin.”
Em bi şervanên YPJ’ê serbilind in
Gaziya şer Zarîn têkildarî 12. salvegera Yekîneyên Parastina Jin (YPJ)’ê jî wiha got, “Weke tê zanîn YPJ 4’ê Nîsana 2013’an li Rojava ji bo parastina jinan û gelên herêmê ava bû û her çû mezin bû. Jinên YPJ’ê li hemberî çeteyên hov ên dijminê mirovatiyê şerekî rûmetê pêş xistin û cîhan ji tehlûkeyeke pir mezin parastin. Em bi şervanên YPJ’ê serbilind in. Weke gaziyeke jin bi vê wesîleyê ez tevahî heval û hevrêyên YPJ’ê bi coşa rojbûna Rêber Apo hembêz dikim. Hevrêyên me yên şehîd jî bi rêzdarî bi bîr tînim.”
Endama Federasyona Gaziyên Bakur û Rojhilatê Sûriyeyê Zarîn Kobanê axaftina xwe wiha bi dawî kir, “Weke gaziyên şer ên ji bo azadiya xaka û gelên xwe berdêl dane, ji niha û şûn ve jî ji bo azadiya fizîkî ya Rêbertiya xwe û parastina gelên xwe em ê têkoşîna xwe pêş bixin. Ez bang li tevahî jin û ciwanan jî dikim ku cihê xwe di nav refên Tevgera Azadiyê de bigirin. Her wiha ji bo rûmeta gelan xwe pêş bixin û berxwedanê mezin bikin.”
