Mamoste, fermandar û hekîma gerîlayan: Zelal Amûdê

Doktor Zelal Amûdê (Cîhan Şêx Elo) li bajarê Amûdê çavên xwe li dinyayê vekir û her dixwest ji gelê xwe û êşa wan re bibe derman. Ji ber birayê wê di ciwaniya xwe de timî nexweş bû pir israr dike beşê tenduristiyê bixwîne û bibe hemşîre. Piştî xwendina xwe xelas dike, 1991’ê beşdarî nav têkoşîna azadiyê dibe û li cem Rêber Apo perwerdeyê dibîne. Li dû perwerdeyê salekê xebatên gel dimeşîne û piştre berê xwe dide çiyayên azad. Jixwe xeyalê wê bû çiyayên xwe yên navdar bibîne, ji bo gel û welatê xwe şer bike.

Hevala Cîhan Şêx Elo ya xweşsohbet bû di nav gel de bi jîrbûn û kûrbûna xwe ya fikrî dihat naskirin. Dema hevala Cîhan çû çiya, malbata wê gelekî bandor bû, ji ber pir pêve girêdayî bûn. Hevala Zelal jî pir hurmet dida malbata xwe, lê di fikir û hestên wê de azadiya gel û welat hebû. Lewma da pey şopa Yusif Emo, Hewas, Reyhan Şiwêş, Merwan Surgicî û qehremanên weke wan ên jîr û jêhatî.

Doktor Zelal li kêleka çek û rextên xwe çenteyê xwe yê dermanan jî dida ser pişta xwe û di şer de senger bi senger digeriya. Birînên hevalên xwe derman dikir da ku baş bibin û karibin şerê rûmetê li hemberî dijminê talanger û qatil bikin. Doktor Zelal pir bi livûtevger, çalak û aktîf bû. Qet di cihekî de nedisekinî. Gelek caran mîna dayikên neolîtîkê ji giya ji bo hevalên xwe derman çêdikir.

Doktor û şîfager Zelal tedawiya gelek hevalan bi serketî temam kir. Hevalan pir hurmet û qîmet didan hevala Zelal û jê hez dikirin. Doktor Zelal di heman demê yek ji fermandarên jin bû. Hevrêyeke pir şareza, jêhatî, bi disîplîn û dilsoz bû. Dizanî wê çawa hevalên li dora xwe perwerde bike. Tevahî tiştên ji Rêbertî fêr bibû dida hevalên xwe da ku ew jî xwe pêş bixin û bibin milîtanên fedaî yên Apoyî.

Dema mirov li hevala Zelal temaşe dikir mirov qet nizanî ku li deşta Rojavayê Kurdistanê mezin bûye. Te digot qey li gundên çiyayî hatiye dinyayê. Hevrêyeke pir xwezayî bû û qet ji qalib û teqlîdan hez nedikir. Şêrejina Kurd Zelal Amûdê pirtûka Tezên Azadiyê ya Rêber Apo her di çenteyê xwe yê dermanan de bi xwe re digerand, dixwend û ji hevalan re jî vedigot. Zelal hem mamoste hem fermandar hem jî hekîma gerîlayan bû.

Doktor Zelal di şerê Zapê yê sala 1997’an de li qada Zapa Mezin dima û li ser yekîneyek hevalên jin bû. Hevrê Zelal di şer de bi rola xwe rabû, pêşengtî ji gerîlayên jin û mêr re kir. Piştre hevalên li Zapê ji qada xwe vekişiyan hatin Kuro Jehro. Fermandar Cîhan Şêx Elo (Zelal Amûdê) sala 1997’an li çiyayê Kuro Jehro di şerekî li hember hêzên PDK’ê (Pêşmergên mala Barzanî) piştî berxwedaneke bêhempa gihişte şehadetê. Doktor û hekîma gerîla di rûpelên dîroka Tevgera Azadiya Jinan de navê xwe bi tîpên herî pîroz nivîsand.

Gerîlayên jin û mêr wendahiya fermandara xwe ji kûrahî de his kirin û soz dan ku wê tola wê ji neyar û xayînan rakin. Piştî şehadeta qehreman û hevrê Zelal, heval û hogirên wê pir xurt beşdarî şer bûn. Wan hevalên bi hevala Zelal re weke hevrê û şervan kar û xebat kiribûn dan îspatkirin ku ruhê fermandar Zelal her bi wan re ye û wê bi wan re bimîne jî. Ez Doktor Zelal careke din bi rêzdarî bi bîr tînim, bejna xwe li beramberî qehremanî û berxwedana wê ditewînim. Jinên çalakvan, bi heybet û xwedî ked ên weke Doktor Zelal wê her ji bo me pêşeng û serkêş bin.

Em ê jî her li ser şop û rêya we têkoşîna bikin da ku em layiqî keda we bin. Careke din di şexsê fermandar û dilêr Cîhan Şêx Elo de hemû şehîdên şoreşê bi bîr tînim, bejna xwe li hember wan ditewînim û soza xwe ji wan re dubare dikim. Em li ser şop û rêça we ne, heya hênasa xwe ya dawiyê.