Gaziyên şer ên Kobanê têkildarî pêvajoyê kom bûn
Gaziyên şer ên Kobanê têkildarî rewşa heyî civiyan. Gaziyan diyar kirin ku wê heya dawiyê xaka xwe û nirxên şoreşa Bakur û Rojhilatê Sûriyeyê biparêzin.
Li Kobanê ji aliyê Federasyona Gaziyên Bakur û Rojhilatê Sûriyeyê ve têkildarî rewşa heyî ji bo gaziyên şer civînek hat lidarxistin.
Civîn bi hejmareke zêde ya gaziyan, bi rêzgirtina ji bo şehîdên azadiyê dest pê kir.
Di civînê de hat diyarkirin ku piştî hilweşîna rejîma Baas jî li Sûriyeyê şer û pevçûn bi dawî nebûne, bi taybet li hember Bakur û Rojhilatê Sûriyeyê êrîşên dewleta Tirk a dagirker û çeteyên girêdayî wê didomin.
Hate destnîşankirin ku tevî bangên Rêber Apo yên ji bo pirsgirêk bi rêya aştiyane bên çareserkirin jî dewleta Tirk dest ji armanca xwe ya jiholêrakirina şoreşa Bakur û Rojhilatê Sûriyeyê bernedaye.
Gaziyên şer di nirxandinên xwe de anîn ziman ku destketiyên îro li Rojava derketine holê bi saya keda Rêber Apo û ya şehîdan ava bûne. Her wiha hate gotin wê gaziyên şer di vê pêvajoyê de ya dikeve ser milên wan pêk bînin, heya dawiyê wê xaka xwe û nirxên şoreşa Bakur û Rojhilatê Sûriyeyê biparêzin.
