Gaziyên şer di refên herî pêş de banga azadiya fizîkî ya Rêber Apo kirin

Gaziyên şer, Şêniyên Hesekê, koçberên ji Efrîn û Serêkaniyê bi meşekê azadiya fîzîkî ya Rêber Apo xwestin.

Gaziyên şer û gelê Hesekê ji bo pêkanîna mafê hêviyê û daxwaza bidawîkirina tecrîdê îro li bajarê Hesekê meşek li dar xistin.

Bi dirûşma “Ji bo Rêber Apo azadiya fizîkî” bi hezaran şêniyên bajarê Hesekê, gaziyên şer, malbatên şehîdan, koçberên Efrîn û Serêkaniyê ji bo azadiya fizîkî ya Rêber Abdullah Ocalan daketin qadan.

Meşê ji Çerxerêya Sînalko dest pê kir, heya Parka Rêber Apo ya li taxa Nasira ya bajêr dom kir. Di meşê de wêneyên Rêber Apo hatin bilindkirin û dirûşmên “Bijî Serok Apo”, “Bê serok jiyan nabe” û “Bi can bi xwîn em bi te re ne ey serok” hatin berzkirin.

Piştî girseya meşê gihişt qadê, ji rêveberiya Kongra Star a bajarê Hesekê Beyan Xelîl axivî. Beyanê diyar kir ku daxwaza tevahî pêkhateyan azadiya fizîkî ya Rêber Apo ye û wiha got: “Mafê Rêber Apo yê azadiya fizîkî heye. Divê mafê hêviyê pêk were û tecrîd rabe.”

Beyanê destnîşan kir ku ji bo pêkanîna banga aştiyê û pêkanînan diyalogiyê divê Rêber Abdullah Ocalan azad bibe.

Hevserokê Meclisa Bajarê Hesekê Faroq Tuzo jî wiha got: “Dewleta Tirk a dagirker naxwaza diyalog û banga aştiyê bigihêje serî ji ber vê jÎ her tim astengiyan derdixe. Em jî di wê baweriyê de ku Rêber Abdullah Ocalan wê ev pêvajo bi ser bikeve û her pêkaheteyek bigihêje. Hêviyên mezin em dijîn, ji ber ku Rêber Abdullah Ocalan di banga xwe de her carê hêviyê dide gelê xwe. Em ê jî her li qadan bin ji bo azadiya Rêber Apo.”