Gaziyên şer 27’ê Mijdarê bi coş pîroz kirin
Cejna Berxwedana Neteweyî 27’ê Mijdarê ji aliyê gaziyên şer ve bi coş hat pêşwazîkirin. Gaziyan diyar kirin ku Rêber Apo û PKK’ê mirovên bi rûmet ên xwedî li nasname, ziman û hebûna derdikevin afirandin û gotin, “PKK’ê bi nirxên afirandin, gelên Rojhilata Navîn ji tarîtiyê ber bi ronahiyê ve bir.”
Gaziyên şer ên herêma Şedadê 47. salvegera damezirandina PKK’ê bi şahiyeke bi coş pîrozkirin.
Di şahiyê de gaziyê şer Hisên Dêrezor destnîşan kir Rêber Apo bi avakirina PKK’ê re ji bo hemû gelan rêya azadiyê vekir û got, “Eger em îro behsa şoreşa gelan û jinan a li Bakur û Rojhilatê Sûriyeyê dikin, ev saya bi hezaran şehîdên di nav refên PKK’ê de têkoşîneke bi heybet û canfeda meşandin pêk hat. Em ê ti carî van şehîdan ji bîr nekin.”
Gaziyê şer Hisên Dêrezor axaftina xwe wiha bi dawî kir, “Rêber Apo û PKK’ê mirovên bi rûmet ên xwedî li nasname, ziman û hebûna derdikevin afirandin. Îro li Bakur û Rojhilatê Sûriyeyê bi hezaran gaziyên şer ên Kurd, Ereb, Asurî û ji gelên cuda hene. Ev heval bi fikir û felsefeya Rêber Apo serwext bûn , xwe gihandin hêz û îradeya ji bo azadiya gelan û xaka xwe têkoşîn bikin. PKK’ê bi nirxên afirandin, gelên Rojhilata Navîn ji tarîtiyê ber bi ronahiyê ve bir. 47’emîn salvegera damezirandina PKK’ê, Cejna Berxwedana Neteweyî li hemû gelên me pîroz be.”
Şahî bi gerandina govendê bi dawî bû.
