ÇIYA

Gava çiya biaxivin,

Bi kevir û dar

Û kaniyên xwe ve,

Bêka çend govend û dîlan

Ew jê re bûne şahid.

Gava çiya bêjin

Çîroka xwe,

Wê çend rûpel

Bêne dagirtin;

Her rûpelek, kirinek, çîrokek,

Berxwedanek, serpêhatiyek

Her rêzeke, berbangek

Û şer û cengek.

Her gotinek navê lehengekî,

Her tîpek

Lêdana dilê mirovkî.

Gava çiya dilê xwe vekin,

Rastiya xwe bêjin,

Ka çiqasî tî bûbû

Û ava jiyanê dixwestin?

Zinar û lat jî

Bila biaxivin,

Ka çiqasî sor bûbûn,

Ji xwîna azadîxwazan.

Belê îro

Deşt jî bûne çiya,

Bajar jî bûne çiya,

Zindanên me jî bûne çiya.

Huseyîn Şawîş

07.12.2009.