Çavkaniya hêz û vînê: Şîlan Kobanê
Îro salvegera 21’emîn a şehadeta endama Komîteya Navendî ya PYD’ê şehîd Şîlan Kobanê û hevalên wê ye.
“Çavkaniya bêrîkirinên jiyana mezin a şehîdên me, di kevana bi bereket de, navenda çavkaniya zayîna şaristaniyê ye… ew firîşteyên welatê bihuştê ne…”
Endama Desteya Rêveber a Navendî ya PYD’ê Meysa Baqî (Şîlan Kobanê), bi wan peyvan behsa hevalên xwe yên jin ên di têkoşîna azadiyê de şehîd bûne kiribû.
Şîlan Kobanê, sala 1971’ê li Rojava Kurdistanê, li gunde Koralî yê girêdayî bajarê Kobanê ji dayik dibe. Di temeneke biçûk de bi malbata xwe re mecbûr ma koçî Helebê bikin.
Hevrê Şîlan di bin zordariya rejîma Baas ya Sûriyeyê de di nav malbateke welatparêz de mezin bû. 1982’yan Rêber Abdullah Ocalan mala wan ziyaret dike. Şîlan wê demê 11 salî ye.
Hevala Şîlan wê ziyareta Rêber Apo wiha tîne ziman, “Ew kêliya herî bi wate ya di jiyana min de bû. Wê rojê min fêm kir êdî jiyana min wê weke berê dewam neke. Ez ê bibama evîndara Kurdistan û azadiyê û li pey wan çûbama… Ez ji çiyayan hez dikim. Dixwazim azad bibim… Ev xeyalê min yê herî mezin e…”
Hevrê Şîlan tişta gotibû pêk anî. Tebaxa 1988’an li bajarê Helebê tevlî têkoşîna Tevgera Azadiyê ya Kurdistanê dibe. Tevî 4 hevalên xwe berê xwe dide Lubnanê û li Akademiya Mahsûm Korkmaz perwerdeyê dibîne. Sala 1995’an di kongreyê de weke endama Komîteya Navendî ya Tevgera Jinan, (YAJK)’ê tê hilbijartin. Heval Şîlan di şertên herî zehmet de bi sekna xwe ya rast bû çavkaniya hêz û vînê ya hevalên xwe. Sala 2003’yan jî weke Endama Desteya Rêveber a PYD’ê tê hilbijartin. Heval Şîlan li bajarê Mûsilê dema ew û çar hevrêyên xwe Zekeriya, Ciwan, Fûad û Cemîl bi karekî radibin, 29’ê Mijdara 2004’an di encama komployeke nemerd de şehîd bûn.
Hevrê Şîlan Kobanî tenê ne ji bo xwe, ji bo tevahî jinan mîras û hêviyeke şoreşê li pey xwe hişt. Heke şoreşa Rojava ya jinan îro li tevahî cîhanê gav bi gav deng vedide û dibe navê hêviyan, di haveynê wê de Şîlan Kobanê heye.
Li Rojava “firîşteyên welatê bihûştê” bi navê Şîlan li pey eşqa azadiyê ne. Berxwedan didome û wê bidome…
