Em şehîd Arjîn Xerzan û hevrêyên wê bi rêzdarî bi bîr tînin
24’ê Adara 2012’an li qada Şêx Cûma ya Xerzanê di encama êrîşeke dewleta Tirk a dagirker de, 15 gerîlayên YJA-STAR’ê di pêşengiya fermandara me ya hêja Arjîn Xerzan de tevahiya du rojan bi lehengî şer kirin û gihiştin şehadetê.
Di wî şerî de hêzên dewleta Tirk a dagirker tevî hemû teknîka pêşketî û hejmara zêde ya hêzên xwe jî nikarî berxwedana gerîlayên jin bişikîne bi nemerdî çekên qedexekirî û kîmyewî bi kar anî.
Koma gerîlayên jin a ji 15 kesan di pêşengiya fermandara hêja Arjîn Xerzan de mohra xwe li destaneke bêhempa ya jinên Apoyî xistin. Berxwedana azadiyê û ruhê azadiyê yê bi Sarayan, Bêrîtanan û Zîlanan dest pê kir, di şexsê hevrê Arjîn Xerzan de berdewam kiriye. Ev hevrêyên me yên şehîd, bûne sembola xeta berxwedana jinê.
Tevgera Azadiyê ya di pêşengiya Rêber Apo de zêdetirî 50 salî ye bênavber didome, xwedî dîrokeke welê ye ku di her kêliyên wê de lehengî û qehremanî hene.
Em weke gaziyên jin ên Federasyona Gaziyên Bakur û Rojhilatê Sûriyeyê şehîd Arjîn Xerzan û 14 hevalên wê di 13’emîn salvegera şehadeta wan de bi rêzdarî bi bîr tînin, bejna xwe bi hurmet û minetdarî li hemberî mezinahî û qehremaniya wan ditewînin.
Ev berxwedana wan şêrejinan îro li her parçeyên Kurdistan û bi taybet li Bakur û Rojhilatê Sûriyeyê ji tevahî şervanên azadiyê re dibe hêz, vîn û cesaret.
Em weke gaziyên jin soz didin ku wêrekî, berxwedanî û têkoşîna fermandar Arjîn Xerzan û 14 gerîlayên azadiyê bigihînin her kesî. Bila dijminê xedar û xayînên rezîl pir baş zanibin ku em ê ti carî dest ji berxwedana Arjînan bernedin. Êrîşên dagirkeran çiqasî mezin bila mezin bin wê ti carî nikaribin evîna azadiyê ya di dilê me de vemirînin. Em ê berxwedana şehîdên xwe bi serketineke herî bi rûmet tacîdar bikin.
Em ê li ser şop û ronahiya wan xwedawend û şêrejinan têkoşîna xwe bilind bikin, paradîgmaya Rêber Apo pêk bînin û pêş bixin. Em dibêjin wê serketin a gelan be û wê jin pêşengên têkoşîn û berxwedana azadiyê bin.
Gaziyên Jin ên Federasyona Gaziyên Bakur û Rojhilatê Sûriyeyê
25.03.2025
